Креативно име, брилијантна идеја, пркос сам по себе за сите оние скептици кои мислат дека Куманово нема (или нема доволно) читачка публика, пријатно место за одушка и литературна поткрепа – тоа е Букси, или како што во Плоштад веќе ги нарековме: лезет книжарница. Сопственичката, Марија Колевски, освен што има храброст да верува во силината на пишаниот збор, исто така, е великодушна, па за прочитаните книжевни дела ќе пишува токму тука, на Плоштад. А, вие бидете мангупи и читајте ги кратките рецензии токму во Букси. И додека сте таму, одберете еден од прекрасните подароци што ќе ви се најдат сигурно, не само за осми март.
“Планината си ти” од Бријана Вист е прекрасна книга која нè учи дека секоја пречка се наоѓа во нас самите, односно дека честопати сме навикнати сите наши сопки,падови и неуспеси да им ги припишуваме на надворешните фактори и токму тогаш кога се чувствуваме дека пред нас имаме да искачиме цела планина – осознаваме дека планината сме ние самите. Многу често се водиме кон самосаботажа, знаеме да се турнеме назад, да останеме во познатото, да не преземемe чекори кон остварувањe на нашите соништа – баш поради страв од неуспех, страв од непознато, страв од мислењето на другите.
Но, тој страв е во нашите глави, стравот е во нас – па затоа, токму и планината којашто треба да ја искачиме – сме ние самите. Книгата е поделена во делови, освестувајќи нè за нашите мисли, за делата и акциите во минатото, за нашата психолошка состојба во таа самосаботажа, а дури потоа за прифаќањето и помирувањето со нас самите; за малите навики што носат големи резултати, за освестувањето и за градењето подобро секојдневие.
Книгата е преполна со многу цитати, мноштво поуки и пораки кои што може да ги усвоите и применувате и со сигурност претставува книга што се чита повеќе од еднаш!
Марија Колевски, сопственичка на книжарница „Букси“ во Куманово.
