Раководителот на секторот за образование во нашата општина, Александар Јовановиќ, можеби е единствениот во рубрикава кој на буквата Ѓ не спомена ѓон. Под „р“ изненадува колку е посветен на својата функција. Под „ѕ“ и „њ“ е досетлив. Азбуката нека биде прирачник за сите ученици на кои им посакува добредојде во школските клупи за оваа учебна година.
А
Азбука, нешто што ме асоцира на почеток, подредено, основно и најважно. Азбука на животот.
Александар, универзално светско античко име кое го носеле многу видни луѓе во човековата историја.
Б
Буквар во издание на Просветно дело, од авторот проф. д-р Ѓорѓи Делчев. Буквар е учебникот со кој ги научивме печатните и ракописните букви.
Буквар печатен, не дигитален!
В
Вода – симбол на животот, бидејќи до 78% од човековото тело е вода.
Водата покрива речиси три четвртини од површината на Земјата.
Водата не само што ја гаси жедта, туку го прочистува организмот и врши рехидратација. Затоа пијте вода!
Г
Говор, претставува основен темел за комуникација.
Говор со кој се служат луѓето на едно подрачје – кумановски дијалект.
Говорот е она што човекот го разликува од другите.
Д
Давид, библиско име, што во превод значи: „Сакан, драг и почитуван човек“.
Давид, цар на Израелско – Јудејското Царство. Малото дете кое го победи големиот Голијат.
Давидова ѕвезда, симбол за среќа и обединување.
Ѓ
Ѓорѓе Балашевиќ. Панонски морнар со гитара, бунтовник и остар критичар.
Ѓорѓе Балашевиќ. За секој негов напишан и испеан стих, кој во тебе побудува длабоки емоции.
Ѓорѓе Балашевиќ: „Луѓето се како школки – треба да отвориш илјадници од нив за да го најдеш бисерот“.
Е
Ернест Хемингвеј и мојот омилен роман: „За кого бијат камбаните“.
Ернест Хемингвеј со „Теоријата на санта мраз“.
Ернест Хемингвеј кој рекол да се стави на хартија сè она што гледаме и доживуваме на најдобар и најинтересен начин.
Ж
Живот, период од раѓање до смрт, сè она помеѓу се нарекува живот.
Желба, да се надоврзам. Секое живо суштество мечтае, посакува и сонува да му се исполни барем една желба.
З
Здравје, бидејќи здравјето секогаш е на прво место и најважно од сè.
Здравје, како добра физичка и психолошка состојба на човекот.
Здравјето бара чување, негување и заштита. Па затоа, чувај го здравјето!
Ѕ
Ѕуница. Оној прекрасен небесен лак кој излегува после дождот.
Ѕуница, преплетена со најубавите бои.
Ѕуница, виножито на кое се воодушевуваме сите.
И
Илинден – Крушево, 1903 година.
Илинден – АСНОМ, 1944 година.
Илинденски секавици. Секавици за сопствена држава и идентитет, секавици на слободата.
Ј
Јован Крстител, важен светец во христијанството.
Јован Крстител, човекот што го крстил Исус Христос во реката Јордан.
Јован Крстител, моја домашна слава и патрон на моето семејство Јовановиќ.
К
Кирил и Методиј – сесловенските просветители.
Кирил и Методиј, светите браќа кои ги удрија темелите на македонската, балканската и европската писменост.
Крсте Петков Мисирков, авторот на книгата „За македонцките работи“.
Л
Литература, најголемото јазично богатство на еден народ, преточено во пишани дела.
Литературата претставува вистинска уметност чие изразно средство е зборот.
Литературата не би постојала во писмена форма, доколку не беа писателите.
Љ
Љубов, инспирација со која можат да се достигнат и највисоките цели.
Љубов кон: семејтвото, работата, науката, спортот, животните, татковината и др.
Љубовта е основа на нашето постоење, рекол Далај Лама.
М
Македонија, нашата прекрасна татковина.
Матеа.
Милена.
Н
Наставник – најблагородната, најубавата, но и најодговорната професија.
Наставник, мотивиран и подготвен покрај сите препреки и неправди во денешното општествено живеење, од ученици да продуцира успешни луѓе.
Наставниците се тие кои ни придонеле на сите да се искачиме таму каде што сме!
Њ
Његош, Петар Петровиќ и делото: „Горски венец“.
Његош, Петар II – како духовен и световен владетел.
Његош: „Кој стои на ридот и малку гледа повеќе од оној под ридот“.
О
Опсесија, бидејќи сите сме биле или сеуште сме опседнати со некоја мисла.
Опсесија кон броевите. „Ако ви е јасно значењето на броевите 3, 6 и 9, тогаш ќе го имате клучот на универзумот во ваши раце“, рекол големиот научник Никола Тесла.
Опсесија за совршенство – К. Роналдо, од авторот Лука Кајоли.
П
Петре М. Андреевски и неговиот роман „Пиреј“.
Петре М. Андреевски: „Племето наше е пиреј и не го крши ни една војска, ни една болест“.
Петре М. Андреевски и најубавите „Касни – порасни“ и „Шарам барам“, со прекрасната „Зелката има кошули триста“.
Р
Раководител, лице што раководи со нешто, а во исто време носи огромни одлуки и одговорност.
Раководител, менаџер, организатор и претприемач, човек со одлични вештини за комуникација.
Раководител како: класен раководител, раководител на смена, раководител на сектор, раководител на претпријатие, стопански раководител и др.
С
Септември или гроздобер, во народното живеење месец од Крстовден до Петковден, месецот на виолетово – сината боја.
Септември, месец за старт на учебната година.
Септември, и тоа осми, Денот на независноста на Р.Македонија.
Т
Татко – маж, родител, творец, основач, зачетник.
Татко, не секој може да се нарече татко, тоа се оние посебни луѓе, посветени на своите деца за да ги изведат на правилен пат.
Татко и ќерка – нераскинлива врска. Kаков татко – таков син.
Ќ
Ќеф, чувство на радост, задоволство и среќа.
Ќеф (Ќеиф) во смисла, гледај си го ќефот – гледај си ја работата.
Ќефот си го гледа и не се оптеретува со ништо.
У
Успех, бидејќи патот до успехот не е права линија.
Успехот се достигнува преку сите поминати издигнувања и падови, искушенија, тоа е една планина исправена пред вас. Таму на врвот на планината ве чека успехот.
Успехот е медал што го освојуваат само најупорните.
Ф
Физичко и здравствено образование, мојот омилен и најзначаен наставен предмет.
Физичко и здравствено образование. Преку вежбите, игрите, спортските содржини прилагодени на детската возраст и правилната исхрана, до целосно физичко здравје и благосостојба на децата и адолесцентите!
Физичко и здравствено образование, преку концепт за здрав и активен начин на креативно живеење со стекнување на навики за редовна физичка активност.
Х
Хомер – слепиот поет, авторот на монументалните епопеи „Илијада“ и „Одисеја“.
Хомер вели: „За секој добар човек најдобро е да си е мерило самиот за себе, но за лошиот човек тоа е најлошо“.
Ц
Цар, не само по титула владетел или монарх, туку по заслугите и успесите.
Цар на животните.
Цар далеку, Бог високо.
Ч
Чест, морална особина за достоинство на човекот.
Чест, преку стекнување на име и репутација во општеството, сè до целосно внимание, почит и признание.
Чест и чист образ.
Џ
Џокер, маската која под неа крие тајни и претставува симбол на смеата, меѓутоа и на тагата.
Џокер, картата што ја имаме во ракавот.
Џокер, личноста која симболизира радост, воодушевување, победи и успех – Никола Јокиќ (Joker).
Ш
Шанса, добра можност и момент за остварување на нешто што го посакуваме.
Шанса и тоа како: историска, реална, втора, единствена итн.
Шанса, се укажува во животот исто како и во спортот, ќе ја искористиш или не, зависи од тебе.
