Таа е убедливо, не еден од нашите, туку нашиот најдобар едукатор. Барем кога станува збор за правописот, книжевната реч, убавиот збор, дијалектологијата на кумановското поднебје. Се вика Наташа Пешевска. Професорка е по македонски јазик. Единствената личност во Плоштад азбука на која нема потреба да преправаме „спејс“ после запирка. Плус, рокерка е.
А
Агора кафиќ, алфа и најверојатно омега на мојот социјален живот.
Б
бурек (со месо) во Башчаршија во Сараево;
В
Владе, татко ми, човек без кој не можам и со кого често не можам да излезам на крај, хахаха.
Г
е за „Господ да ни е на помош“ и за категоријата „господин човек“ кон која треба да се тежнее;
Д
детство, дете, добрина кон себе и кон другите;
Ѓ
Ѓоковиќ само поради апелот да не го пишувате и изговарате како [џокович], зарем ѓон е џон?! (Апелот не се однесува на кумановци.)
Е
елитно во смисла на елитна и масовна култура, никако поинаку;
Ж
жар, именка што има два рода: жарот, жарта;
З
за здрави заби одете на забар;
Ѕ
ѕитче или „ѕ’тче“ пред „Браќа“ каде што со мојата генерација почнавме да излегуваме навечер;
И
избор, како ќе избереш, така ќе живееш; да избираме мудро за да не се повторува историјата;
Ј
јуфки домашни и јорган, иде зима;
К
Куманово и кумановци, сас кумановски език, посебни и автентични до бескрај;
култура или кич, не одат заедно, едното преовладува на сметка на другото;
кума ми Циге– мојата поддршка низ годините;
Л
лебот наш насушен за кој многу векови сме биле желни; „еде ми се леб“ – во превод: гладна сум;
Љ
љубопитност и тоа онаа детската;
М
Македонија, мајка, милост и уште многу други меки зборови;
Н
негација не со која се поставуваат здрави граници;
Њ
Њузнет поткаст, омилен;
О
„Животот е како огледало, ако му се насмееш и тој ќе ти се насмее“- Васил Иљоски;
П
за почеток почит кон правописот;
патувања надвор од границите на државата и на егото;
Р
радост, ама животна радост кај секого;
С
презирам скржавост и материјална и духовна;
светоглед-сѐ повеќе го слушам овој збор;
Т
„Толи Зордумис“ училиште, мое второ семејство и мој втор дом;
тага, ако си дозволиме тагување, ќе имаме добро ментално здравје;
Ќ
со ќеф го користам овој турцизам, ама на кумановски како „кеф“, а ги подзаборавам „ќулафка“ и „ќушне“;
У
убавината ќе го спаси светот и најсериозно верувам во ова;
Ф
професорот Драган-Фантом, кој францускиот јазик ни го предаваше како филозофија на животот;
Х
хоризонт, херој, хигиена, телото како храм на душата;
Ц
Цариград кафиќ и сѐ е кажано;
Ч
е за чичо ми Круме, еден и единствен;
Џ
Џемс Џојс со неговите џиновски реченици;
„Џабе работи-џабе не седи“-поговорка која во денешнинава нема смисла;
Ш
шеесет се пишува со три „е“ и не се шегувам.
