Поддржувач на ученици и критичар на уништувачи на етички и професионални вредности, професор по математика, ментор, автор на наставно – научни трудови и специјалист за математичкото образование. Тоа е Даниела Стојановска, поборник на заложбата учениците да имаат училиште по своја мерка, а не по мерка на луѓето од власта. Најзините ставови никогаш не ја „држат“ страната која не „држи“ вода, па оттука и нејзината аверзија кон партиски членски книшки.
А
Ајнштајновите теории за релативност и бесконечност. Сè е релативно, бесконечна е само човековата глупост;
Б
божем, божем сме професионални, божем сме одговорни, божем сме политичари, божем си го сакаме Куманово…;
В
вечноста на „покровителите“ на политичките кампањи, кои училиштето го „средуваат“ по мерка на власта, наместо по мерка на детето (ненаучена лекција);
Г
Годо, „Чекајќи го Годо“, драмата на апсурдот на С. Бекет, синоним за општественото живеење;
Д
Дана, баба Дана, слаткарница Корзо, Занаетчиски дом. (Чоколада и ванила, сладолед или кремче и зелена лимонада од крушка. Кој пробал, памети);
Ѓ
ѓубре, како често користен опис на психолошки профил на човек;
Е
единствени вредности: наука и уметност;
Ж
желби, остварени или неостварени, важно, да ги има;
З
забошотување, да се прикрие вистината од другите, додека да се заборави;
Ѕ
Ѕука, прекар кој со генерации го носат членовите на мојата фамилија, синоним за правичност, одговорност, стручност и професионалност;
И
Институт за математика при ПМФ, на кој му ги должам професионалните постигања;
изгрејсонце, нов ден, со нова надеж;
Ј
Јована Ѕука, го прави светот поубав одошто е;
К
Кумановски џез фестивал со Влатко Стефановки, Теодоси Спасов и Мирослав Тадиќ во бавча на кино Козјак;
Л
„Лет во место“ на безвременскиот драматург Горан Стефановски;
Љ
е за љубопитните од секторот за оговарање и тревожење во мојот колектив.(не е за Биљана, за Билјана е);
М
математика или наука за нештата кои сами по себе се очигледни. Математичко образование, мастер студии, математичка креативност;
Н
не смее и не треба неверојатно да се пишува одделно;
Њ
Њутновиот закон за акција и реакција;
О
образованието да е закон, а законот да е образуван;
П
Петар, кој ме научи дека тетка е институција за безрзервна љубов и безусловнии отстапки;
Р
размислување, критичко размислување како интелектуален процес со кој се нуди решение на проблем, подобар од сите претходно понудени решенија за истиот проблем. Сè друго е просто критикување;
С
создавање смисла, сочувствување, систематичност;
Т
тетратката е со квадратчиња и не може да се нарекува тетратка во коцки;
Ќ
ќерамитчиња неопходни за играта „кленѕа војска“, од времето кога децата играа игри на сокак;
У
ученици, моите седум генерации ученици, нивните будалаштини и нивните успеси;
училиште кое живее со будалаштините на децата, а изумира од будалаштини на возрасните;
Ф
факти, нешта кои се земаат за точни само ако се докажани;
Х
харизма, харизматичност (денешен раритет);
Ц
центар на кружница, центар на град и комплексите на луѓето кои мислат дека се центар на светот;
Ч
чест, чесен, чесност;
Џ
Џонатан Ливингстон, галебот од басната на Ричард Бах;
Ш
шах, секогаш ќе се најде некој коњ со желба да те матира.
