Во врска со случувањата во ЈП Дом за стари лица „Зафир Сајто“, до граѓаните на Куманово и до ПЛОШТАД Редакција, се обрати ОО СДСМ Куманово. Нивното обраќање го пренесуваме во целост
Почитувани сограѓани,
Покрај бројните скандали за кои секојдневно слушаме во речиси сите јавни претпријатија и установи во Општина Куманово под раководство на кадри на ЗНАМ, на површина излегуваат сериозни информации и за случувањата во ЈОУ Дом за стари лица „Зафир Сајто“.
Јавно го прашуваме директорот Дејан Стојановски:
- Дали е вистина дека 70% од вработените во установата се пожалиле на мобинг од ваша страна, поради што била организирана и средба во просториите на ЗНАМ во Куманово?
- Дали е точно дека на таа средба, токму претседателот на ЗНАМ Куманово бил „стручното лице“ кое утврдувало дали постои мобинг?
- Дали се вистинити информациите објавени во медиумите дека сте извршиле плаќање за набавка на мебел кој никогаш не бил испорачан во установата?
- Постои ли финансиска поврзаност меѓу вас и претседателот на ЗНАМ Куманово во однос на оваа набавка?
- И конечно, дали вие или лица блиски до вас сте стекнале финансиска или материјална корист од незаконски платениот тендер?
Воедно, јавно го прашуваме и градоначалникот Максим Димитриевски:
- Дали сте запознаен со состојбите во Домот за стари лица „Зафир Сајто“ и што конкретно преземате за заштита на вработените и корисниците на оваа установа?
- До кога кадровските решенија на ЗНАМ ќе бидат синоним за скандали, злоупотреби и сомнежи за криминал?
Очекуваме одговори, транспарентност и одговорност!
OO СДСМ КУМАНОВО
