Ученичката Меланија Станковиќ од ООУ „Толи Зордумис“ е прва во дисциплината фрлање ѓуле на општинскиот натпревар во атлетика што се одржа изминатиов период. На минатогодишните првенства, исто така, таа го освои првото на општинскиот, а потоа и првото место на државниот натпревар со резултат 8,79 метри. На ова првенство го урна сопствениот рекорд и фрли 10,15 метри.
Меланија Станковиќ е одлична ученичка во 8 одделение во ООУ „Толи Зордумис“, Куманово. За себе вели дека е девојче кое сака да се забавува со врсниците, да ги прави истите работи како и нејзините другари и неретко се „заробува“ во виртуелниот свет на социјалните мрежи. Но, нагласува дека е трудољубива и упорна и неслучајно успехот што го постигна се должи на многу упорност, вежбање и одрекување од секојдневните работи. Нејзина голема желба е да ја претставува Македонија на Олимписките игри и сонува гордо да застане под македонското знаме.
За да ја постигне својата цел, вредно и дисциплинирано работи на часовите по ФЗО и тренира со својот наставник Иван Крстевски. Нејзиниот наставник има само пофални зборови за неа. Тој се гордее со неа и истакнува дека Меланија е талентирана спортистка која има конкретна цел и вредно работи на нејзиното реализирање и остварување. За само една школска година Меланија го подобри сопствениот рекорд за дури 1,36 метри. Во блиска иднина очекува Меланија да биде подготвена да фрли околу 11 метри и да настапи на повисоко рангиран натпревар во рамките на регионот.
Иван Крстевски е наставник по ФЗО во ООУ„Толи Зордумис“ веќе неколку години. За себе вели дека ја работи најубавата и најблагодарната работа што може еден човек да ја работи. Како наставник сака учениците да стекнат навика за спортување и активност, затоа што тоа е единствениот правилен начин за добар психофизички развој на еден млад човек.
Тој ги препознава вистинските таленти уште во најрана возраст и работи на развивање на вештините кај таквите ученици. Како вистински професионалец го препозна талентот кај Меланија за фрлање ѓуле. Заедно работат на развивањето и унапредувањето на техниката за да постигнат поголеми успеси.
Иван Крстевски неслучајно знае како да постапува со учениците кои покажуваат одреден спортски интерес, но и да работи на препознавање и развивање на талентот кај учениците. Тој како активен спортист, во моментов е репрезентативец на Македонија во футсал и државен првак во футсал со екипата на „Форца“.
Училиштето е гордо на двајцата и им посакува постигнување на уште многу успеси на претстојните натпревари, првенства, турнири. Денеска тие се наши спортски херои на кои треба да се угледаме и сите заедно да ги поддржиме во остварување на нивните цели.
Меланија и Иван, училиштето „Толи Зордумис“ се гордее со вас и вашите спортски успеси!
