Реновирањето на спортската сала беше тема на денешната прес конференција на ОО СДММ Куманово.
Нивното соопштение ви го пренесуваме во целост.
Данијел Димитријевски – Член на ИО на СДММ. Куманово
Почитувани граѓани на Општина Куманово,
За секој кумановец слаба точка е Спортската сала во Куманово, која што е изградена во далечната 1980 година и има капацитет од 4150 седишта. Таа е најголемиот затворен спортски објект во Куманово, каде што се одржуваа многу кошаркарски, ракометни, одбојкарски, боксерски и футсал натпревари. Владата во 2020 година ја врати во сопственост на Општина Куманово, откако со неа стопанисуваше приватен субјект. Веќе 4 години сме сведоци дека нашата убавица – Спортската сала се реновира. Проект на реновација, што треба да чини 6,5 милиони евра. Најпрвин сѐ почна со замена на кровот и трибините, но уште од самиот почеток на реновирање имаше низа пехови и аномалии. Тукушто поставениот нов кров протече, а излезе и скандал со набавката на семафорот, чија цена изнесувала 160.000 евра?!
Но тоа не е сѐ! Да не заборавиме да го прашаме градоначалникот во заминување, дали ќе се реши проблемот со системот за греење и ладење и дали тој проблем ќе донесе дополнителни трошоци?! Веќе беше најавено дека Спортската сала ќе биде пуштена во употреба за Денот на ослободување на Куманово – 11 Ноември, но очигледно на кумановчани не им беше кажано за која година е предвидено. Нам ни останува само да чекаме кога конечно ќе се заврши со нејзиното реновирање, и во меѓувреме да се надеваме дека нема да излезе уште некој скандал поврзан со Салата и реновирањето.
