Педесет и девет невини жртви, Господине Христијан Мицкоски, ти одат тебе на душа.
Имаш ли проблеми со сонот или мирно спиеш? Имаш ли „епизоди“ на анксиозност и страв од „оној горе“?
Имаш ли можеби немир или чувство како да се наоѓаме на раб на бездната? Така е со самовластието, даскале… Ја сакаше сета власт, сакаше да одлучуваш за се, да раководиш со се, да наредуваш, заповедуваш, командуваш. Ама со тоа оди и сета одговорност да е твоја. Апсолутна моќ – апсолутна вина. Сфаќаш?
Зошто сакаш да си и адвокат и обвинител и судија? Зошто не го пушташ Судот да си ја работи својата работа? Изгледа дека нешто во кочанската трагедија ти прави проблем, не ти дава мир. Нешто сериозно те загрижува. Што ќе правиш ако некој од твоите проговори? Ако, бранејќи се себе си, го открие твојот удел во трагедијата? Ако, по некое чудо, вистината излезе на виделина. Што ќе правиш тогаш?
Кочанчани ти овозможија да се качиш на тронот, да загосподариш со Македонија. Убаво им се оддложи.
По којзне кој пат пак невесела слика во Македонија.
И Панче е грешен, грешен и тоа многу. К’о црн ѓавол е.
Се обрукавте и ти и тој. И тоа многу.
Не го пуштај Бране да се резили по телевизиите. Ти излези и кажи кога ќе почне истрагата за Модуларната болница во Тетово. Кој ден? Ај, да те видам, ако смееш?
А, треба да има. Исто како што треба да има истраги и за несреќата кај Ласкарци и за онаа што се случи во Бугарија.
Мислиш дека велешанецот, кому, од што е алчен, цел свет да му го дадеш ќе посака да чепне и од Марс, ќе ти рече „Ајде!“
Ти и Панче направивте од државава башибозук. Собравте околу себе безкарактерни соработници, корумпирани до срж. Во 2015 година посадивме некоја билка на демократијата, ама таа не се фати убаво, едвај се одржуваше во живот. Постојано ја „наводнувавме“ за да не се исуши, за да не исчезне. Ама демократијата, која сега е болежлива, нежна и чувствителна пак ќе се врати. Ти и оној Великомаченикот Никола немилосрдно ја згазивте. Тој тогаш, а ти сега. Безчувствително. Без трошка грижа на совест. Затоа што ниту ти, ниту тој, Архиепископот Унгарски и Македонски, во демократија не верувате. Ти веруваш во правото на посилниот, во елиминацијата на неистомислениците. Не делевте и не делите на патриоти и предавници. Со кое право, жити се? Врз основа на што ти судиш за другите? Демек, ако не сме те разбирале и не сме биле на твоја страна не сме национално освестени. Тие што се од кај тебе се патриотите и никој друг не е, така?
Македонското граѓанство, Мицковски, гордо и достоинствено на свој трошок пак почна да маршира за правда и правичност. Тоа, знам, те прави многу нервозен. Ти иде на нерви, не можеш да ги гледаш. Тоа е вистината што ти блеска право во очи. Сите би ги испотепал кога би можел и би смеел. Те читам како буквар. Ги грицкаш ноктите и смислуваш освета. Ги пушти на најјако партиските ебиветровци да се закануваат со насилство и терор кон тие што ќе напишат нешто, што и да е, што е поинакво од она што ти го мислиш. Со пари и притисоци правиш привид, ја силуваш реалноста. Ама младите ја разбиваат таа илузија. Ќе ти дојдат до глава… и на тебе и на таквите како тебе.
Твоето место во историјата на Македонија е загарантирано. Запечатено. Ќе бидеш запаметен како последниот узурпатор на власта, последниот автократ. Со Панче, барабар, ќе сте последните кои го јавале овој народ и му ја кроеле капата. Последните кои одлучувале кој да умре, а кој не. Македонија се буди, се освестува. На работ на бездната сме. Немаме каде веќе. Треба или да тргнеме кон поарно, или да потонеме со вас.
Нема систем, а треба и мора да има… Систем во кој сите ќе сме исти. Не ја браниш ти Македонија, а ниту Панче ја брани, Македонија сама се брани од тебе и од него и од таквите како вас кои 30 години го надвјасаа овој народ.
Тие што ти се колнеа на вечна верност и ти се потпикнуваа ќе те остават на цедило, ќе те продадат, онака како што го продадоа и Груевски. Ќе останеш сам, поразен и скршен, и без зборови на утеха и сожалување. Никој не те поддржува од убедување. Искрено и чесно. Те поддржуваат само оние што ќе ги платите, поткупите или уцените.
Те поддржуваат од страв или користољубие. Вие немате народ зад себе, туку клиентела. Клиентела и робови. Обесправени, во нужда и немаштија. Не сметај на беспризорните богаташи на кои им дарувате државни пари, земјиште и води.
Криминалци, бе, криминалци те чуваат. „Патриотски“ се пљачкосува државава и уздуж и попреку.
На митинзи, додуша не сте имале извесно време, ви доаѓаат наемници. На секој властодржец по градовите и општините им кажувате по колку да стават во автобус и да ги дотераат до престолнината на митинг. Не ви доаѓаат заради идологија. Идат, кој за што… Едни за сендвич и кока кола, други за сладолед, и тоа не обичен „ескимо“, туку за оној „убавиот“, трети за работа.
Донесени луѓе од ваму од таму, полни автобуси платени обожаватели. Порачано скандирање, диригирано ракоплескање…
Нови биографии за нови лидери ни се пишуваат пред очи со уверување дека брзо и лесно ќе се заборават минатите денови и политичките ставови. Купените дипломи, плагијат-докторатите, незамисливите политички комбинации и сојузи од интерес…
Не внесовте во време на војни, беда, пустош, на морално и вредносно руинирање, грабежи, бесрамни лаги, измами и тешки страдања на народот во кој се колнете на секој чекор.
Али, даскале, ти ништо не разбираш. Ниту Ти, ниту пак Панче, а и оние 120 „разбојници“ кои сите до еден, и тие од десно и тие од лево, и тие што се по среде, од што се изморија од многу работа, ден два по трагедијата во кочанската дискотека зедоа слободни денови. Веројатно и никогаш нема да разберете. Немате, бе, вие способност да разберете за што се работи. Твоите, ти се смеат зад грб. И ти се ругаат. Не приметуваш, нели? Не приметуваш затоа што не сакаш да приметиш. Јадни сте, бре, сите. Јадни и никакви!!!
Пу, бе, јаз’к да ни е!
Не знаеме да одбереме вистински човек за функционер. Во светот има многу нечесни политичари, но оние што во Македонија го носат тоа звање ги поминуваат сите граници. Лагата во македонската политика влезе на голема врата. Видлива е на сите нивоа. Лажат многу, сочно и богато. Лажат, што вели народот, штом отворат уста. А, ќе зинат, а ќе излажат. Нема некој од нив што го нема тој манир. Ветуваат работи повеќе од оние што реално можат да ги исполнат.
Еден одамна вгнезден во Собранието ми кажуваат се водел по, за мене, прилично макијавелистичка синтагма за ова прашање… вели: „Што мислиш, не кажувај, тоа што го кажуваш не го пишувај, тоа што ќе го напишеш не го потпишувај, а тоа пак што ќе го потпишеш не го признавај.“
Понекогаш, рака на срце, што е право – право е, некој кажува и по нешто точно. Ете, Павле на пример… Павле пред отприлика една недела ги собра сите дваесет и еден член од неговата партија, сосе тие од неговата фамилија се толку, одржа состанок и кажа дека „работата во моментов е многу сериозна“.
Како па да не му верува човек на Рашко… Правеле дома кај нив мекици за синовите и собрале ни помалку ни повеќе сто и кусур илјади евра. Ако не беа и повеќе. Таква прича, уверен сум, ниту на Минхаузен не би му паднала на памет.
Од пиљари, направивме милионери или милијардери, што и да е. Кафански свирачи се вивнаа со височините… Сега навистина некои се во притвор, ама па што и ако се… ќе им останат украдените „пасати“ од најновите, „ролексите“ од по пеесет-шеесет илјади евра, становите…
ПС: Туку, професоре, послушај ме што ќе ти речам. Не зимај калинки, ѓумбири, авокадо… За лешниците и бадемите не ти велам да ги оставиш, оти ти требаат, си љубиш седенки…
На менито имај Ашваганда. Таа билка која се користи илјадници години. Расте во топлите краишта, а се смета дека потекнува од североисточните делови на Индија. Се нарекува уште и индиски женшен или зимска цреша. Најчесто се користи нејзиниот корен. Екстрактот од ашваганда е исклучително потентен суплемент. Еден од главните бенефити е нејзиното корисно и позитивно дејство при справување со стресот и анксиозноста. Ашвагандата се смета дека има корисно и позитивно дејство врз ендокриниот, нервниот, имуниот и кардиоваскуларниот систем. Таа учествува во регулирање на метаболизмот и му помага на мозокот при изложеноста и одговорот кон некаква стресна ситуација. Дополнително, таа има антиоксидативно и анти-воспалително дејство, со што ги заштитува клетките од оштетување кое може да биде особено нагласено при хроничен стрес, а ти имаш стресови уште од моментот кога бидна премиер.
Марјан Славко
