Не постојат кратки најави за уметнички души. Барем не за една кумановска, која по својата самостојна изложба во јануари годинава, го селектира материјалот за уште две – апстрактната „Живе“ и „Живе“ предмети од применетата уметност. Работи со глина, гипс, на хартија и во декупаж техника, рециклира мебел, „од шаку брашно и малко шикер или сол“
– што викав кумановци, може да направи кулинарско ремек дело. Од тато Панчо талент наследен, од Ани, Магда и Бела во љубов претворен. Живка Величковска – умешна, срдечна, вредна, креативна, неуморна, златна жена, на Плоштад пишува незаборавна азбука.
А
Алтер его – моето прво јас: аналитика, логика и практичност и моето второ јас: имагинација и креација
Б
Боса, боси, босоноги – детство
В
Внука ми Бела, неизмерна љубов
Г
Гордост, моите ќерки, мојот живот
Д
Дарбата е од Господ дадена
Ѓ
Ѓоковиќ, годините се само бројка
Е
Ееее, епа нема: ем – ем
Ж
„Жал за младост“ – Коштана
З
Зграби го животот
Ѕ
Ѕид – се гради, се урива, а понекогаш и прескокнува – обиди се и ќе успееш
И
И така понатаму си врви животот
Ј
Јазик – македонски и наш кумановски
К
Карактер, или го имаш или го немаш
Л
Леснотија – уметност на живеењето
Љ
Љуба – жена – сопруга
М
Мајка ми, мајчинство, милост божја
Н
Небо – Се вели само небото е граница, а јас велам: небото нема граница, сѐ е можно кога сакаш
Њ
Њивче – а бе не би било лошо да си имам едно родно њивче
О
Оглед – со и без – не е исто
П
Проштевање и благодарност, пат кој води до внатрешен мир
Р
Роза, мојот омилен цвет
С
„Сам па како знам“
Т
Татко ми Панче, мојот најголем учител во животот
Ќ
Ќебапи, десетка со младо кромитче, Опанчарско сокаче во башча на стар Палас, ммм…
У
Убавината на постоењето – не секогаш препознаена, секое утро е подарок, уживај во животот…
Ф
Фантазијата е таа со која секогаш ќе бидеме над вештачката интелигенција
Х
Хумор и сатира – „Oстен“ со јубилеј 80 години постоење
Ц
Цвеќе, мојата инспирација
Ч
Човек, со големо Ч – скапоценост
Џ
Џабе работи, џабе не седи
Ш
Шегобиец, бекрија – Батко Ѓорѓија
