Сончева насмевка, добрина и многу љубов греат душа вткаени во нејзиното име – Љубинка. Со топлина и букет убави зборови што ги дарува на саканите дома, на нејзината најмила Вики, на сите драги луѓе и на нејзините ученици, таа остава траен белег на безброј генерации како креативна и посветена учителка и како активен член на Здружението на одделенски наставници ЗОН Учител и во претседателството на Здружението на просветни работници – Куманово. Синоним за милост за сите што ја знаат, Бубе за Плоштад исплете пролетно венче, најлична азбука посветена на нејзината мајка.
A
Анархија, архаичност, акростих – Првото општо присутно во сите сегменти од живеењето , второто застарени стилови, изрази, но сепак значајни за ова денешно време, а третото почетни букви, мозаик од стихови.
Б
Благодет е да се има мајка која денес би славела именден – Благица (Благовец). Азбуката ѝ ја посветувам на мојата хероина, мама Бацка.
В
Викторија, нашата победа, милост и најголема радост, синоним за вредноста на нашето постоење.
Мило, скромно и ненаметливо дете, таква е Вики.
Г
Горда на моите родители, прекрасни и незаменливи.
Грб на кој носиш куп обврски.
Д
Драган, мојата поддршка, подвижна енциклопедија од кого можеш да научиш сѐ. Партнер со кој храбро и упорно го одевме патот пред да стигнеме до нашата победа – ВИКТОРИЈА.
Дом во кој се чувствувам своја и заштитена.
ДЕТЕ во себе, кој секој го носи цел живот.
Ѓ
Ѓердан од нанижани зборови (искрен, добар, лојален, кроток, тивок, честит), треба да го носиме за да научиме што е вредно во ова модерно време.
Е
Енергија, елан, емпатија (сите три заедно) носат мир, спокој, убавина…
Ж
Желба остварена, да бидам мајка, исполнет долгоочекуваниот сон кој стана јаве.
З
Зора во која ја слушам тишината и спокојот што дава чувство на смиреност.
Ѕ
Ѕвезда што секој ја носи на челото и која блеска и привлекува.
Ѕвоно кое не би требало да нѐ прекинува кога сме креативни, кога создаваме и твориме.
И
Идеја, интерес, идеологија во правец на усовршување на самиот себе.
Ј
Јас, скромна, тивка, оригинална но сепак своја.
К
Карактер, она што најмногу ме привлекува и она што го имам наследено од родителите.
Л
Лупа, голема но невидлива за да може да ги перципираме работите какви што се…
Лусија, најмилата и најмалата наша внука.
Љ
Љубинка, име кое носи љубов и дава љубов.
Љубомора, збор на кој сум алергична.
М
Мисла, која често знае да ме расположи , но и да ме натажи. Велат, какви мисли имаш таков ќе ти биде и денот.
Мартин, Матео нашите прекрасни внуци , мили и духовити.
Н
Надеж, нов ден исполнет со сончевина и бистар ум.
Њ
Њушка, Кумановци така ги отсликуваат незгодните персони.
О
Огледало во кое секој треба да се погледне и да ја види вистината за себе…
П
Песна од срце и душа, подарок кој најмногу сакам да го дарувам на драгите луѓе.
Р
Раритет, тешко е да си во овој свет, но сепак ги имам околу себе и ги сакам.
С
Семејство, дар од Господ , мое најмило и најдраго.
Тоа е нишка која нѐ сплотува.
Сестра, сосема различна од мене, но сепак е моја сестра.
Т
Татко мој, кој имаше посебна добрина, човек со очи ко на срна.
Тамара нашата прва внука, моја другарка со која споделувам дел од секојдневието.
Ќ
Ќејф, да си направиш на себе, без да размислуваш што ќе кажат другите.
У
Учител, ученици, дел од моето професионално опстојување и креирање.
Универзум, каде ја давам својата љубов и енергија секој миг од моето постоење.
Ф
Фељтон, има моменти во кои би пишувала романи за многу мои сегменти од животот.
Х
Христијан Карпош, училиште во кое работам, соработувам и едуцирам нови генерации.
Хор за возрасни (она што недостасува во нашиот град).
Ц
Цвет, биди како цветот кој не размислува за натпреварување со другите цветови, тој само цвета. ТАА СУМ, ТАКВА СУМ.
Ч
Човек, колку тоа гордо звучи – Максим Горки.
Биди ЧОВЕК, секогаш и секаде.
Џ
Џабе ти е едукација ако немаш мотивација, почит и разбирање.
Ш
Што ми е гајле! – Зрелоста си го кажува своето.
Шаховска табла со фигури. Такви сме и ние луѓето, нѐ поместуваат, нѐ буткаат ако им дозволиме.
Шега на своја, но и на туѓа сметка. Шегувајте се луѓе, дружете се меѓусебе.
